काठमाडौं । सन् २०२६ मा भारत र श्रीलंकामा आयोजना हुने पुरुष टी–२० विश्वकपका लागि नेपाल छनोट भएको छ ।
एसिया तथा एसिया प्यासिफिकतर्फबाट छनोटसँगै नेपाललाई विश्वकपका महारथी देशसँग खेल्ने ढोका पनि खुलेको छ । विश्वकपमा २० टोली खेल्नेछन् ।
नेपाल लगातार दोस्रोपटक आइसिसी पुरुष टी–२० विश्वकपमा छनोट भएको हो । समग्रमा नेपाल तेस्रोपटक विश्वकप खेल्दै छ । यसअघि नेपालले सन् २०१४ र २०२४ मा विश्वकप खेलेको थियो ।
सन् २०१४ मा नेपालले पारस खड्काको कप्तानीमा विश्वकपमा स्थान सुरक्षित गरेको थियो भने एक दशकपछि पुनः विश्वकपमा छनोट हुँदा रोहित पौडेल कप्तान थिए । अहिले पनि उनै पौडेलको कप्तानीमा नेपाल विश्वकपमा छनोट भएको छ ।
पछिल्लो खेलमा ओमानलाई ३८ रनले हराउँदै अपराजित यात्रा कायम राखेको नेपाल छनोट प्रतियोगिताको उपाधिको नजिक पुगेको छ । नेपालले अन्तिम खेल सामोआसँग खेल्ने तालिका छ ।
नेपाल क्रिकेट संघ (क्यान)का अध्यक्ष चतुरबहादुर चन्दले विश्वकपमा लगातार दोस्रोपटक छनोट देशका लागि गौरवको विषय भएको बताए । विश्वकपमा छनोटले चुनौती पनि बढाएको उनले बताए ।