काठमाडौं । सर्लाहीमा बोलबम तिर्थयात्री सवार ट्याक्टर दुर्घटना हुँदा घाइते भएकी एक महिलाको उपचारको क्रममा मृत्यु भएको छ ।
आइतबार भारतको मढिया स्थित मन्दिरमा जल चढाएर फर्कीएका तिर्थयात्री सवार ज।२ त ३२७ नम्बरको ट्याक्टर मलंगवा नगरपालिका १२ गम्हरिया छेउको नहरमा खसेको थियो। दुर्घटनामा परेर पाँच जना घाइते भएका थिए । घाइतेमध्ये चक्रघट्टा गाउँपालिका- ५ निवासी जोगीन्द्र मण्डलकी पत्नी ४५ वर्षीया पतही देवीको मृत्यु भएको प्रहरीले जनाएको छ ।
गम्भीर घाइते पतहीलाई उपचारको लागि वीरगंजस्थित नेशनल मेडिकल कलेज लगिएको थियो। उपचारकै क्रममा उनको मृत्यु भएको हो ।
अन्य घाइतेको मलंगवास्थित प्रादेशिक अस्पतालमा उपचार भइरहेको जिल्ला प्रहरी कार्यालय सर्लाहीले जनाएको छ ।