काठमाडौं । साविक उपविजेता फ्रान्स र नर्वे फिफा विश्वकप २०२६ को अन्तिम १६ मा प्रवेश गरेका छन् ।
न्यूयोर्क न्यू जर्सी रंगशालामा आज बिहान सम्पन्न खेलमा स्वीडेनलाई ३–० गोलले हराउँदै फ्रान्सले अन्तिम १६ मा स्थान पक्का गरेको हो ।
फ्रान्सका लागि कप्तान किलियन एम्बाप्पेले दुई तथा ब्राडली बारकोलाले एक गोल गरे । खेलको ४५औं मिनेटमा एम्बाप्पेले गोल गर्दै फ्रान्सलाई पहिलो अग्रता दिलाएका थिए ।
जारी विश्वकपमा ४ खेलमा ६ गोल गरिसकेका एमबाप्पे यस विश्वकपमा अर्जेन्टिनाका कप्तान लियोनल मेसीसँगै सर्वाधिक ६ गोल गर्ने सूचीमा अगाडि छन् ।
यसैबीच, विश्वकप फुटबल २०२६ को अन्तिम ३२ को रोमाञ्चक खेलमा एर्लिंग हालान्डले खेलको अन्तिम समयमा गोल गरेपछि नर्वेले आइभोरी कोस्टलाई २–१ गोलले पराजित गरेको छ ।
यो जितसँगै नर्वेले अब अन्तिम १६ को भिडन्तमा ब्राजिलसँग खेल्नेछ । अमेरिकाको डालसमा भएको खेलको ८६ औं मिनेटमा हालान्डले निर्णायक गोल गरेका हुन् ।
त्यसअघि नर्वेका एन्टोनियो नुसा र आइभोरी कोस्टका अमाद डियालोले एक–एक उत्कृष्ट गोल गरेका थिए ।