काठमाडौं । नेपाली महिला राष्ट्रिय टोलीले मैत्रीपूर्ण खेलमा बुधबार साँझ भारतको सामना गर्दैछ ।
खेल सिक्किमको पाल्जोर रंगशालामा नेपाली समयअनुसार साँझ ५ बजे सुरु हुनेछ । नेपाल र भारत दुई दिनको अन्तरमा दोस्रो पटक आमने सामने हुँदैछन् ।
यसअघि नेपालले कप्तान सावित्रा भण्डारीको दुई गोलको मद्दतमा भारतलाई २–१ ले पराजित गरेको थियो ।
आज भने सावित्राले नखेल्ने भएकी छिन् । सावित्रा व्यावसायीक फुटबलका लागि अस्ट्रेलिया फर्किसकेकी छिन् ।
सावित्रा न्युजिल्यान्डको क्लब विलिङ्टन फोनिक्समा आबद्ध छिन् । यो क्लबले अस्ट्रेलियन महिला लिग खेल्ने गर्छ ।
मिडफिल्डर प्रीति राई र गोलकिपर अञ्जिला सुब्बाले पनि आजको खेल नखेल्ने भएका छन् ।
नेपाल र भारतबीच हालसम्म १८ खेल भएका छन् । जसमा नेपालले चार जित दर्ता गरेको छ ।