काठमाडौं । प्रतिनिधिसभा विघटन भई २१ फागुनका लागि निर्वाचन तयारी भइरहेको वेला संघीय संसद्को माथिल्लो सदन राष्ट्रिय सभाको अधिवेशन आह्वान भएको छ । मन्त्रिपरिषद्को बैठकले सिफारिस गरेअनुसार राष्ट्रपति रामचन्द्र पौडेलले अधिवेशन आह्वान गरेका छन् । पौडेलले आगामी ४ माघको बिहान ११ बजे पहिलो बैठक बस्ने गरी आह्वान गरेका हुन् ।
‘सरकारको सिफारिसमा माघ ४ गते आइतबारका दिन ११ बजे संघीय संसद् सचिवालय सिंहदरबारमा राष्ट्रिय सभाको अधिवेशन आह्वान भएको’ राष्ट्रपति कार्यालयका प्रवक्ता रितेशकुमार शाक्यले सोमबार जारी गरेको विज्ञप्तिमा छ । सरकारको सिफारिसमा राष्ट्रपतिले अधिवेशन आह्वान र अन्त्य गर्ने व्यवस्था छ । सभाको बैठक सिंहदरबारस्थित तत्कालीन कृषि समितिको बैठक बस्ने हलमा बस्दै छ ।
जेन–जी आन्दोलनको क्रममा नयाँ बानेश्वरस्थित संसद् भवनमा आगजनी भएकाले सिंहदरबारमा बैठक बस्ने गरी बोलाइएको हो । जेन–जी आन्दोलनपछि पहिलोपटक राष्ट्रिय सभा बैठक बस्न लागेको हो । जेन–जी आन्दोलनपछि सुशीला कार्की नेतृत्वको सरकारको सिफारिसमा राष्ट्रपति पौडेलले प्रतिनिधिसभा विघटन गरी आगामी २१ फागुनका लागि निर्वाचन तोकेका छन् । सरकारको सिफारिसमा राष्ट्रपतिले गत ३१ भदौमा राष्ट्रिय सभाको अधिवेशन अन्त्य गरेका थिए ।
अधिवेशनमा विचाराधीन विधेयक र अध्यादेशमाथि पनि छलफल हुनेछ । राष्ट्रिय सभामा पाँच विधेयक विचाराधीन छन् । सभामा विचाराधीन अभौतिक सांस्कृतिक सम्पदा (संरक्षण) विधेयक, राष्ट्रिय विधि विज्ञान प्रयोगशाला (स्थापना र सञ्चालन) विधेयक छन् भने तीनवटा विधेयक विधायन समितिमा विचाराधीन छन् । जसमा पर्यटन विधेयक, चलचित्र विधेयक र सामाजिक सञ्जाल विधेयक छन् । यस्तै, प्रतिनिधिसभा सदस्य निर्वाचन (पहिलो संशोधन) अध्यादेश र नेपाल विशेष सेवा (दोस्रो संशोधन) अध्यादेश छन् ।